Pidarta Perpisahan SD Mebasa Bali

“Om Swastiastu”

Lugrayang titiang ngaturang suksmaning manah sane teleb antuk pangrauh para atiti sinamian. Titiang ngewalinin sisya kelas lima merasa bagia pisan santukan sisya kelas enam sampun sida ngemarginin sane mewasta UAN. Wiakti UAN punika pinaka puncaking karya ring sekolah santukan marupa ujian sane mabuat pisan. Saking iriki, galah sane becik puniki tiitang ngaturang suksmaning manah majeng ring rakan-rakan titiang ring kelas enam sane sampun prasida ngicenin adik-adik kelas conto sane becik, minakadi seleg melajah tur ngemargiang UAN tanpa wenten katinggal.

Inggih para atiti miwah para sisya sinamian, bangga mecampuh sedih wiakti tiitang ring galahe sekadi mangkin. Bangga turmaning bagia, santukan sisya kelas enam puniki sami prasida lulus. Sedih, kangen aturang titiang sekadi wawu dibi iraga sareng-sareng ngranjing iriki, saget sampun rauh panemayane patut mepalasan.

Inggih rakan-rakan titiang sane pacang ninggalin sekolah, titiang madue besen wantah asiki, inggih punika eling. Eling ring sekolah iriki, SD N 3 Tusan genah maguron-guron enam warsa sane ebek ring suka duka, eling ring semeton sisya, yadiastun suang-suang pacang mepalasan.

Inggih para atiti miwah warga sekolah sinamian, asapunika atur titiang pinaka wakil saking kelas lima, nunas geng rena sinampura manawi wenten kekirangan ring penyambran titiang. Sapunika taler marep ring para sisya, utamine sisya sane pacang ninggalin sekolah puniki, titiang ngewakilin para sisya kelas satu ngantos kelas lima nunas pangampura, minab wenten sane nyekelin keneh mangda rakan-rakan titiang ngampurayang ngantos tuntas. Kaping untat, malih pisan titiang ngaturang suksmaning manah sane teleb ring para atiti miwah kulawarga sekolah sinamian. Pidarta puniki titiang sineb antuk nguncarang parama shanti,

“Om Shanti,Shanti,Shanti Om”